Lëtzebuerg genéisst en exzellente Ruff an Europa, souwuel wat d'Liewensqualitéit ubelaangt wéi och um Niveau vun der gënschteger Besteierung. An Immobilien zu Lëtzebuerg investéieren ass deemno eng gutt Iddi fir jiddwereen, deen e séchere Placement an d'A faasst.

En attraktiivt Land fir en Investissement mat héijem Potenzial

D'Lëtzebuerger Wirtschaft floréiert, an dat zitt vill Investisseuren un. D'Land zielt zu deene räichsten op der Welt, an de Chômage-Taux ass niddreg. Mat enger Bevëlkerung, déi permanent wiisst an der Presenz vu villen auslänneschen Aarbechter klëmmt och d'Nofro am Beräich vun de Locatiounen. En Investissement an Immobilien zu Lëtzebuerg erlaabt Iech, vun engem reegelméissegen Akommes ze profitéieren a gläichzäiteg e Patrimoine opzebauen, deen Dir Ären Nokommen hannerloosse kënnt.

Wann Dir drun denkt, eng Immobilie zu Lëtzebuerg ze kafen, musst Dir wëssen, datt d'Präisser héich sinn, an datt Äre Budget sech entspriechend upasse muss. Wéi vill aner Haaptstied an Europa bleift d'Stad Lëtzebuerg déi deierst Stad am Grand-Duché. Fir an en neit, héichwäertegt Appartement ze investéieren, adresséiert Iech u Sonntag-Immobilien, Äre Promoteur fir Immobilien zu Lëtzebuerg

Wéi eng Steiere gëllen am Immobilieberäich zu Lëtzebuerg?

Nottärskäschten

D'Nottärskäschten ëmfaassen all d'Käschten, déi mam Kaf vun enger Immobilie verbonne sinn. Si ginn un den Nottär bezuelt.

Steieren, déi un d'Steieramt ze bezuele sinn

• Enregistrement- an Iwwerschreiwungstaxen
Den normalen Taux fir de Kaf vun enger Immobilie (Haus, Appartement, Bauplaz) läit bei 7 %, dovun entfale 6 % op d'Enregistrementstax an 1 % op d'Iwwerschreiwungstax, berechent op de Präis vum Grondstéck an den eventuell realiséierte Konstruktiounen.

Enregistrementstaxen
Et gi verschidde Fäll, jee no Wunnuert a Verwendungszweck vun der Immobilie, déi kaf gëtt:
• E Keefer mat Wunnsëtz zu Lëtzebuerg, dee plangt, seng Immobilie selwer ze bewunnen, profitéiert bei den Enregistrement- an Iwwerschreiwungstaxe vun engem Forfait vun 100 €, wann dës Taxen – d. h. 7 %, gerechent op de Betrag vum Grondstéck an den eventuell realiséierte Konstruktiounen – net iwwer dem Steierkredit vun 20.000 € pro Persoun leien (cf. ënnen, Punkt D. Bëllegen Akt);

• E Keefer, deen net zu Lëtzebuerg wunnt an net plangt, seng Immobilie selwer ze bewunnen, muss d'Enregistrement- an Iwwerschreiwungstaxe virstrecken, ka se awer spéiderhi recuperéieren, andeems hien e Certificat de résidence un den Nottär schéckt aus deem ervirgeet, datt hien och an der Wunneng, déi hie kaf huet, wunnt;
• E Keefer, dee säin Appartement verloune wëll, huet keen Usproch op e Steierkredit a muss d'Enregistrement- an Iwwerschreiwungstaxen, d. h. 7 %, gerechent op de Betrag vum Grondstéck an den eventuell realiséierte Konstruktiounen, integral bezuelen.

Ausgabe vum Nottär
Dëse Betrag entsprécht dem Remboursement vun de Käschten, déi dem Nottär ënner Ëmstänn am Kader vum Kaf vun der Immobilie entstane sinn. Dozou zielen zum Beispill Käschte fir d'Ufroe vun Extraiten aus dem Kadaster, d'Beschafe vu verschiddenen administrative Schrëftstécker beim Syndic de copropriété, bei de Verwaltungen asw.
Honorairen a Vergütunge vum Nottär
Hei handelt et sech ëm d'Remuneratioun vum Nottär, déi an engem groussherzogleche Reglement festgeluecht ass. Si entsprécht ongeféier 1 % vum Präis vum Grondstéck an den eventuell realiséierte Konstruktiounen.

Hypothéikekäschten
Heibäi handelt et sech ëm eng dénglech Sécherheet, déi sech op eng Immobilie bezitt, an déi de Remboursement vum geléinte Betrag garantéiert.
Den Nottär gëtt beoptraagt, den Akt iwwer déi konventionell Hypothéik opzestellen. Heiduerch entstinn Nottärskäschten, déi och ze berücksichtege sinn.
Fir datt d'Hypothéik Drëttpersounen (d. h. eventuelle Creanciere vum zukünftege Proprietär) géigeniwwer opposabel ass, muss se an engem vun den Hypothéikebüroen zu Lëtzebuerg agedroe ginn.
Beispill: bei enger Immobilie mat engem Kafwäert vu 400.000.- € muss ee mat ongeféier 2.700.- € Hypothéikekäschte rechnen (Enregistrement- an Iwwerschreiwungskäschten an Honorairë vum Nottär).

Wann d'Immobilie virum Oflaf vun der Lafzäit vum Immobiliekredit verkaf gëtt, muss de Verkeefer dofir suergen, datt dës Hypothéik opgehuewe gëtt. Fir dës Formalitéit muss en neien Akt beim Nottär erstallt ginn, fir deen zousätzlech Käschten ufalen.

Reschtscholdversécherung
D'Kreditinstitut verlaangt an der Reegel eng Reschtscholdversécherung, déi de Solde, deen nach ze rembourséieren ass, ofdeckt, falls den Emprunteur virzäiteg stierwe sollt.

Bëllegen Akt” oder Steierkredit
Fir d'Niewekäschte beim Kaf vun enger Wunneng ze reduzéieren, huet d'Regierung en Abattement op den Enregistrement- an Iwwerschreiwungstaxen agefouert, deen als Steierkredit (oder och de "Bëllegen Akt") bezeechent gëtt. Dëse gëllt fir Persounen, déi eng Immobilie kafen an der Absicht, selwer dran ze wunnen.
De Steierkredit ass op 20.000.- € pro Keefer limitéiert. Bei enger Koppel gëtt dëse Betrag verduebelt.
Den Enregistrement (Administration de l’enregistrement et des domaines) erhieft an alle Fäll e Mindestbetrag vun 100.- € als Enregistrementstax.

De Keefer muss d'Wunneng effektiv a perséinlech bannent engem Delai vun 2 Joer nom Kafvertrag virum Nottär bewunnen, a muss sech bei Immobilien, déi nom 1. Januar 2008 kaf goufen, verflichten, d'Immobilie wärend engem onënnerbrachenen Zäitraum vu mindestens 2 Joer ze bewunnen.

En anere steierleche Kaddo ass déi niddreg Grondsteier zu Lëtzebuerg, ausserdeem gëtt et keng Besteierung op der Plus-value beim Verkaf vun engem Haaptwunnsëtz. An net zulescht kënnen d'Zënse vun Hypothéikekreditter an Héicht vu bis zu 10.000 .- € d'Joer fir Koppelen zum Beispill steierlech ofgesat ginn. Wann Dir Iech zu Lëtzebuerg nidderloosst, a sief et och nëmme fir e puer Joer, dann hutt Dir all Interêt, Proprietär ze ginn, aplaz vu Locataire